صوت مصر
كتبت : صابرين العمده
– - المسلسلات معظمها مبشر .. مفيش غير ٣ حلقات بس اللي مقدرتش اكملهم للاخر.
– دي اول مرة تقريبا ادان المغرب نفسه يبقى اعلان مدفوع.
– دينا الشربيني صحيت على كابوس وحش عن ابنها “كامل العدد” .. صبا مبارك صحيت على كابوس ان جوزها طلقها “لحظة غضب” .. حسن الرداد صحي على كابوس ان حد بيضربه بالنار “محارب”.
– مي عمر لأحمد زاهر : انا رزقي في الدنيا كلها انت “نعمة الافوكاتو” .. منة فضالي لأحمد زاهر : بحمد ربنا كل يوم انه رزقني بزوج من الجنة زيك “محارب”.
– اول مشهد في “سر الهي” روجينا صحيت مفزوعة على جوزها وهو بيسرقها، وأول مشهد في “امبراطورية ميم” خالد النبوي صحي مفزوع على خناقة اولاده مع الجيران.
– غادة عبدالرازق مبتعرفش تنام غير لما تاكل شيكولاته “صيد العقارب” ومي عمر مبتعرفش تسوق غير وهي حافيه “نعمة الافوكاتو”.
– الترويج لحملة ١٠٠ مليون صحة في الحلقة الاولى من “امبراطورية ميم” و”المعلم”.. ومشروع حياة كريمة “صدفة” .. تكافل وكرامة “المعلم”.
– احمد زاهر مش فاكر عيد جوازه “نعمة الافوكاتو” ومصطفى شعبان مش فاكر عيد جوازه “المعلم”.
– نعمة الافوكاتو .. أول دور لـ مي عمر بدون مكياج أو ضوافر أكليريك.
– المداح .. دياب طالع بنفس صوت شيخ العرافين ف برنامج “العرافة”.
– سر إلهي .. روجينا نزلت من بيتها وسابت باب الشقة مفتوح ومفيش حد نبهها من فريق الاخراج.
– مشهد سهر الصايغ لما عرفت ان عندها لوكيميا “المعلم” ومشهد اجهاض يسرا اللوزي “صلة رحم” ومشهد اعتراف احمد بدير لروجينا بأن ابنه هو اللي قتل اخوه “سر إلهي” .. من أكتر المشاهد صدقا في الحلقة الاولى للمسلسلات.
– دينا الشربيني دايخة على مربية لابنها “كامل العدد” .. واسماء جلال دايخة على داده تساعدها “اشغال شقة”.
– بنت مي سليم ومراد مكرم عايشة في دور البلوجر “سر الهي” .. بنت دينا الشربيني عايزة تبقى بلوجر “كامل العدد .. سلمى ابوضيف وليلى زاهر بقوا انفلونسرز “اعلى نسبة مشاهدة”.
– احمد السبكي ظهر في مشهد بنفسه في دور تاجر اجهزة كهربائية، وفي مشهد تاني بإسمه في اغنية لمحمود الليثي.
– مصطفى غريب “بابا جه” و “اشغال شاقة” دمه أخف من مصطفى غريب “الكبير”.
– عفاف شعيب عملت جمعية عشان تجوز بفلوسها ابنها حسن الرداد “محارب” ، وروجينا عملت جمعية عشان تجوز اختها نهى عابدين “سر إلهي”.
– أفضل حلقة أولى بدون ترتيب : امبراطورية ميم – اعلى نسبة مشاهدة – بابا جه – مسار اجباري – المعلم – نعمة الافوكاتو – الحشاشين – صلة رحم – حق عرب – سر إلهي.
– التترات معظمها حلو ومختلفة وفيها افكار كويسة بس اكتر ٣ تترات علقوا معايا “سر إلهي” و “امبراطورية ميم”و”المعلم”.
– عفاف شعيب “محارب” .. احمد بدير “سر إلهي” .. جنين يسرا اللوزي “صلة رحم” .. ابرز ضحايا اليوم الاول من رمضان.
– شكرا مدير التصوير حسين عسر “الحشاشين” – الموسيقار أمين بوحافه “الحشاشين” – مهندس الديكور احمد عباس “اعلى نسبة مشاهدة” – مهندس احمد ابو السعد “مكساج اشغال شقة” – الستايلست خالد عزام “اعلى نسبة مشاهدة” – الماكييرة ميرا حيدر “صلة رحم”.
– يبدو ان كلام الحق مبقاش مفهوم.. احمد عيد “الحشاشين”.
– الطبع بيطلع من البني ادم بعد روحه .. سلوى خطاب “المعلم”.
– ابوكي عمره ما مد ايده عليا ولا غلط فيا بكلمة لأني كنت بعرف امتى أشد وامتى ارخي، امتى اسكت وامتى اتكلم ، امتى افتح بؤي واتكلم وامتى اعمل فيها هبلة واطنش .. عايدة فهمي ” صيد العقارب”.
– الفلوس لما بتدخل بين الاهل بتبقى فتنة.. حسن الرداد “محارب”.
– العيال الصغيرة دي عايزه تحب وتعيش القصة وبعدين يلزقوكي على قفاكي .. فرح يوسف “اعلى نسبة مشاهدة”.
– مبيكسرش الراجل غير ضناه.. احمد فؤاد سليم “المعلم”.
